وصفة قلب اللوز الاصلية التقليدية مع اسرار نجاحها

وصفة قلب اللوز الاصلية التقليدية مع اسرار نجاحها

السلام عليكم ورحمة الله و بركاته ،الكثير الي طلبوا مني وصفة قلب اللوز ،قلب اللوز عندو وصفات كثيرة لكن تبقى الوصفة الاصلية دائما عندها طعم خاص ،هنا راح نعطيكم الوصفة التقليدية مع اسرار نجاحها .
ادعولي بالخير برك

مقادير قلب اللوز:

- العجين
- 1 كلغ سميد خشين لازم انتاع الميزان شرط ضروري تشوفو فيه حبيبات بيضاء و سوداء.
- 500 غ سكر عادي
- 100غ سمن ذائب و بارد
- رشة ملح
- ملعقة صغيرة لافاني
- 200 غ ماء زهر + ملعقة عطر ماء زهر
- 250غ ماء دافئ مش سخون

شربات :

- 500 غ سكر

- 1 لتر ماء + شرائح ليمون او قطعة صغيرة شب

- 200 غ كوكاو محمص ومدشش او لوز مدشش

- غبرة الكاكاو

- حبات لوز او كوكاو

-شوية قرفة مرحية

طريقة التحضير قلب اللوز :

- اولا نحضر الشربات نضع السكر مع الماء و شرائح الليمون نحطوهم فوق النار بمجرد يبدا الخليط يغلي نخفض النار الى درجة متوسطة و نحسب مدة 10 دقائق ثم نطفي النار ونخليه يبرد . لازم يبات باش يثقال
- نحطو السميد مع السكر تحكوهم مليح بايديكم لمدة لاتقل على 20د تزيدو السمن ،رشة الملح ،ملعقة لافاني الي الهدف منها هو نغطيو بيها ريحة السمن و ايضا تساعد باش تطلع ريحة الماء زهر و تزيدو تحكو مليح حتان يوجعوكم يديكم ههههه،نحطو 100غ ماء زهر ما يعادل فنجان اتاي كبير من الاحسن تكون نوعية جيدة او استعملو ماء زهر و اضيفولو عطر ماء زهر ، وزيدو حكوه حتان تتعبو مدة 20د
السر في نجاح قلب اللوز هو انكم تخلطو جيدا المكونات ،لازم تحكوهم بايديكم على الاقل 20 حتى نصف ساعة حتى كي تهزو الخليط تعودو ما تشوفوش في حبات السكر تندمج مع السميد ،في حالة ما اندمجتش المكونات رح يجيكم قلب اللوز يابس من فوق ومن تحت ،تقدرو تستعملو آلة العجين نتاعكم استعملو k اي الورقة ،ما ديروش الكروشي خطراش يعجنلكم يخرجلكم مادة الغلوتين من السميد الي تخليه يدير العلك ،
- اذا استعملتو الة العجين خلطو لمدة ربع ساعة وكل مرة انتبهو للحواف خطراش يطلع الخليط على الجوانب
- بعد هذه العملية غطيوه مليح بورق الشفاف ما لازمش يدخلو الهواء وخليوه يبات ليلة كاملة باش هاذاك السميد مع ماء زهر يشرب هاذاك ليدام
- غدوة من ذاك جيبو الخليط تلقاوه نشف وعاد يشبة للطعام ،احكمو حلوه بايديكم جيدا و ضيفولو باقي ماء زهر و ابقاو تخلطو لمدة 20 دقيقة تحكوه و ضيفو باقي الماء باديكم لازم تتحصلو على خليط معسل ثم تعرفو بلي السكر ذاب تماما وتخلط مع السميد وهنا حرارة اليد تعاون باش يذوب هاذاك السكر.
- تقدرو ديرو هاذي العملية باآله العجين نتاعكم دايما تستعملو k ،الورقة .
- بعدها نخلطو مع شوية عجين كمية من المكسرات مع شوية قرفة و كاكاو .
- بعد ما تكملو ادهنو سينية نتاعكم بالزيت من بعد فرشو نصف الخليط اغطسو يديكم في الماء باش ما يلصقش فيهم ، و من بعد حطو الحشو سواء كوكاو او لوز ومشوه مع العجينة دائما اغطسو يديكم في الماء ثم حطو الطبقة التانية و ابداو وسويو السطح نتاعو جيدا باليد ثم ادهنوه بالزيت و من بعد سووه ب coupe pâte - قاطعة العجين ،لازم يكون سطح املس و جميل.
- مالازمش ديرو قلب اللوز طبقة سمكها خشين يجيكم ثقيل وما ينجحلكمش
- قطعو قلب اللوز نتاعكم بالطول فقط وطبعا يبقى امر اختياري تقدرو تقطعوه مربعات ،لكن انوه انو قلب اللوز التقليدي ما يتقطعش مربعات حتى يطيب باش يتقطع.
- ارشقو حبات اللوز او الكوكاو نتاعكم ،طيبوه على 200 درجة في فرن مسخن ربع ساعة مسبقا ،تخلوه حتى يطيب جيدا لازم ياخذ هذاك اللون المائل للبني ،من احد اسرار بنة قلب اللوز هو انو يطيب مليح،كي تشوفو الحواشي طابو لدرجة قريب يتحرقو ثم تعرفو بلي قلب اللوز نتاعكم طاب ، اشعلو الفور من فوق و خلوه يتحمر كي تشوفوه رايح قريب يتحمر اجبدوه و ادهنوه بالسمن بأستعمال فرشات سيليكون و ردوه يتحمر جيدا من فوق و وخرجوه مدة الطهي 40د مباشرة شربوه بالشاربات
- كي تخرجو قلب اللوز راح تمسو طبقة من فوق تلقاوها يابسة بمجرد تبداو تفرغو عليها شاربات تبدا تشرب بعد ما يشرب كي تمسو الطبقة تلقاوها رجعت طريقة والشاربات يبدا يبقى من فوق ثم توقفو ما تزييدولوش .
- في حالة بقالكم سطح يابس وما تشربلكمش الشاربات اعرفو بلي السميد نتاعكم ما خدمتوهش مليح مع السكر،حاولو دخلوه في الفرن وهو سخون وطافي مدة دقيقتين فقط باش يعاود يشربلكم الشاربات وتنقضو قلب اللوز تاعكم،اما اذا كان يابس من فوق وتحت فهنا مشكل سكر هو الي تكرمل و يبس .
- من بعد ذوبو شوي تاع سمن وخلطوها مع 2 او 3 مغارف عسل و ادهنو السطح من فوق تاع قلب اللوز وهذا هو سر لمعان قلب اللوز تاع المحلات .
- خليوه يبات ليلة كاملة باش هاذوك حبات تاع السميد يتشربو مليح و يتنفخو
- ملاحظة :الوصفة التقليدية تاع زمان نديرو 1 كلغ سميد مع 700 غ سكر